Tuesday, 28 July 2009

公平4

話說﹐窮人朋友同富人朋友係非洲做完義工﹐番到香港後一個星期:

: “真係一個難忘既經歷﹐好似突然間覺得好充實咁。

: “我都係咁話﹐見識到好多野。

: “我地幾時再去做義工﹐不如今次去幫香港裡面既隱蔽青年?上次睇新聞話好多青少年沉迷打網上游戲而唔番學唔番工﹐要靠父母養﹐變左社會既寄生蟲。

: “唔去﹐點解我要幫佢地?”

: “幫佢地過番d有意義既人生有咩問題?”

: “佢地要自暴自棄關我咩事?”

: “你忍心睇住一堆大好青年﹐將佢地既時間青春浪費響無意義既事情上?”

: “我上次肯去非洲﹐係因為佢地處於無可耐何既情況﹐非洲細路要捱肚餓並唔係佢地既錯﹐而係佢地既先天條件不足﹐唔好彩咁響一個無咩天然資源既國家出世。而呢堆隱蔽青年就唔同﹐佢地起碼有手有腳﹐有錢買電腦﹐有錢買游戲﹐又有父母養﹐又唔係無書佢地讀﹑無工佢地開﹐而係佢地根本唔想讀﹑唔想做﹐佢地根本就無意願想做一個"大好青年"﹐我做咩要幫佢地。我所見既非洲既人就唔同﹐個個都好似響額頭刻住"我唔想死"四個字咁。

: “所以我地先要幫佢地﹐幫佢地搵番生存既鬥志﹐搵番生存既意義。我地上次去非洲係提供物質上既幫助﹐今次幫隱蔽青年係提供心靈上既幫助﹐我覺得將會更有意義。

: “我唔同意﹐香港同非洲唔同﹐香港已經提供左一個公平競爭既平台﹐呢班隱蔽青年競爭失敗中途退出係佢地無用﹐競爭有贏有輸係好正常﹐佢地無鬥志係佢地自己既事﹐鬥志呢家野要靠自己既﹐我唔覺得有需要幫﹐亦唔覺得幫佢地有意義。

: “佢地只不過係一時誤入歧途﹐重拾鬥志後又是一條好漢。我反而覺得香港會有隱蔽青年係因為社會競爭太激烈﹐比佢地既壓力太大﹐佢地不得已先會選擇逃避﹐呢個已經係社會問題﹐我地作為社會既一份子﹐好應該出一分力。

: “可能你有道理﹐但係我自己本身都有一大堆問題等住我解決﹐我父母等住我養﹐我層樓又供緊﹐份工又忙到死﹐又要供細佬讀書﹐邊有時間考慮其他人。我呢種平民﹐照顧到自己三餐已經好好﹐極其量照顧埋自己身邊既人﹐再有剩餘能力先可以向興趣或理想發展﹐真係無咁既時間同能力去幫d三唔識七既人。

: “原來係咁.........”

: “...........”

: “唉﹐四十二章經話"貧窮布施難"﹐真係無講錯。

: "!四十二章經夠話要"去世資財﹐乞求取足﹐日中一食﹐樹下一宿"﹐你試下丫笨!"

Wednesday, 22 July 2009

公平3


話說﹐富人朋友同窮人朋友走左去非洲既某個國家做義工:

: "派米比飢餓既非洲人真係好有意義﹐佢地今年旱災呀。"

: "係呀係呀﹐真係不枉我請左一星期假﹐你知我呢d社會基層﹐手停口停架啦。"

: "我都係啦﹐我做少一日就可能搵少十幾萬"

: "話時話﹐點解我地條隊特別短咁既?"

: "係啵﹐隔離個兩條隊排到龍尾都見唔到﹐我地條隊最多就得百幾人。"

: "唔通隔離條隊d米好食d?"

: "點會呀....."

: "咁唔通係因為你生得樣衰?"

: ".........."

: "直頭係啦﹐頭先有個壯漢一見到你就嬲爆爆咁走左去隔離隊由頭排過﹐水蛇春咁長呀隔離條隊。"

: "係啵﹐頭先仲有個阿嬸﹐我比左包米佢﹐佢就喊到豬頭咁﹐我見佢咁肚餓就再比多一包佢啦﹐點知佢要左之後喊得仲犀利﹐好似死左全家咁。"

: "講真呢到既人都幾無禮貌﹐送野食比佢多謝都無句﹐仲要個個都眼超超。"

: "唔係啵﹐隔離隊d人好有禮咁﹐又有笑容又講多謝咁"

: "又好似係。"

: "哇呢個小朋友唔止唔講多謝﹐仲向我地吐口水添。"

: "真係有無搞錯﹐我捱左成個月方包罐頭杯仔麵先夠錢黎做義工﹐但係就受到咁既待遇。"

: "我夠係啦﹐我推左成個禮拜十幾個appointment先黎倒做義工。"

: "呀領隊先生﹐借問聲﹐你知唔知佢地點解會咁態度既?"

義工團領隊: "之唔係因為你地著住既呢對勝利女神波鞋囉﹐你兩條友烚下烚下都學人走黎做義工。"

&: "勝利女神波鞋?!"

領隊: "隔離鎮有間勝利女神波鞋工廠﹐專請廉價童工﹐待遇好差﹐朝七晚十一做唔停﹐而且成日聽到有細路係裡面做到嘔血﹐又或者比監工毆打既傳聞。呢到有唔少人都有細路係裡面打工。頭先個阿嬸有兩個仔都去左個間廠做野﹐做左差唔多一年幾之後就無左音訊﹐去問廠家淨係話佢地無再係度做﹐搵又搵唔到人。"

&: "咁既事都有?"

領隊: "無計啦﹐佢地真係手停口停架﹐寧願做死都唔寧願餓死﹐而且如果佢地唔做﹐大把其他細路爭住做﹐有時仲可能連屋企人都等住佢地份糧開飯﹐寧願自己做死都唔寧願屋企人餓死。廠家見到咁既情況﹐時薪越壓越低﹐咁班細路既工時就越黎越長﹐最慘就係幾辛苦都有人爭住做。"

&: "哇﹐喪盡天良呀。"

領隊: "係呀﹐呢個情況係呢個國家都幾普遍﹐做你廿對咁既波鞋可能就死一個細路﹐所以呢到既人見親有人著勝利女神波鞋都唔會比好面色佢睇。頭先個阿嬸見到你對波鞋就好似見到殺自己兩個仔既仇人咁﹐你諗下如果你要問仇人施捨食物會係咩感覺。"

&: "原來係咁。"

領隊: "呢個國家土地貧脊﹐又無咩天然資源﹐個個人都要搵飯食﹐工錢自然低﹐資本家睇中呢點係到設廠﹐用不公平既工資換取最大既勞動力﹐但係又無人有佢符﹐因為無左呢類工廠就無收入﹐更加多人會餓死﹐眼白白睇住佢壓價。"

: "真係搞錯﹐呢個世界本身已經唔公平﹐仲要有人為左謀利而利用呢種唔公平﹐搞到越黎越唔公平。"

如是者﹐餘下既幾日﹐富人朋友同窮人朋友都做左赤腳義工﹐一個星期既義工生涯就咁就過左﹐話咁快又番左香港嘆世界。

: "呢個國家既人真係犀利﹐生存條件咁惡劣都捱得住﹐仲要細細個就出黎做野。"

: "係囉﹐寧願做死都唔寧願餓死﹐佢地既生存意志真係強。"

電視機: "六點半新聞報導﹐今日下午三點﹐葵芳xx村有一名十六歲少女懷疑因為感情問題而服用過量安眠藥自殺﹐依家情況危殆。另外﹐灣仔區有一名十四歲少年因為網上游戲既賬號被父親終止而企圖跳樓﹐一度與警方對持。依家交比香港大學陳教授講下青少年沉迷網上游戲既情況....."

: "........"

: "........"

: "呢個世界真係咩人都有。"


Monday, 20 July 2009

公平2


某日﹐富人朋友和窮人朋友在下戰棋....

: "將軍無棋﹐哇哈哈﹐五連勝!"

: "無可能﹐點解又係你贏?"

: "我一出世就註定係醒過你﹐唔到你唔服。"

: "我就係唔服﹐我就係唔服你一出世就醒過我。"

: "我都唔服﹐點解我明明醒過你﹐你就有錢過我。"

: "我家底好﹐承繼左老豆盤生意﹐唔到你唔服。"

: "超﹐靠老豆!"

: "哇我搵既每一毫子都係辛苦錢黎架。"

: "我就唔信你同d客戶傾下生意會辛苦得過我朝八晚十寫程式。"

: "哇你以為好易﹐有時分分鐘要陪客飲幾打啤酒食幾包煙先開始傾生意﹐仲要唔知傾唔傾得成。我既錢係搵條命換番黎﹐唔係好似你坐響office打幾隻字有錢收咁舒服。"

: "哇唔係囉﹐你收入係我五倍﹐又唔見你工作既辛苦程度就係我既五倍?"

: "工作性質都唔同。"

: "就係囉﹐我假假地都係專業既程式員﹐點解因為工作性質唔同﹐收入就少你五倍?"

: "........"

: "........"

: "講開又講﹐我一得閒就會鍛煉棋藝﹐時不時重溫高手對戰﹐又刨棋書又盛﹐點解仲係贏唔到你?"

: "天份問題啦好明顯。"

: "........"

: "........"

: "其實個世界都幾唔公平。"

: "係囉﹐布殊明明蠢到死﹐靠老豆就做到總統。"

: "係囉﹐陳冠希一生出黎就咁靚仔﹐咁賤格都溝到咁多女。"

: "不過講到唔公平﹐最慘係明仔﹐一出世就輕度弱智。"

: "仲有強仔﹐本來年年考第一﹐又叻仔又乖仔﹐點知比個車禍撞死左。"

: "要講慘﹐依家非洲蘇丹都仲有奴隸制度﹐只不過係投錯胎就成世無自由。"

: "中國臨汾市既細路仲慘﹐污染咁嚴重﹐大部份一出世身體就有缺憾。"

: "咁講法其實香港都仲算係一個公平既地方﹐起碼仲有唔少福利幫助家境唔好既家庭﹐老人﹑傷殘人士又有唔少優惠﹔無論出身係點﹐後生仔肯讀書上進都可以搵兩餐飯食唔會餓死。"

: "其實我地真係唔應該怨命﹐我地有手有腳無穿無爛再怨世界唔公平既話真係好折墮。"

: "無錯。"

: "不如我地搵時間去非洲做義工。"

: "好主意。"

: "........"

: "........"

: "話時話﹐呀李澤X真係唔話得﹐副豪華限量版無敵鍍銀戰棋萬幾蚊一套﹐我話同佢夾錢買﹐佢嫌夾錢麻煩就成套送左比我。"

: "........"

: "........"

&: "點解我老豆唔係李嘉誠?!"

Sunday, 19 July 2009

公平

從前﹐有一對好朋友﹐一個很富有﹐另一個比較窮﹐兩人決定夾錢買一副豪華對戰棋﹐但卻因為如何分帳而爭論不休:

: "明明是你比較有錢﹐你應該出多一點﹐這才公平!"

: "這才不公平﹐一半一半才公平"

: "你擁有的比較多﹐付出的當然應該比較多。"

: "對戰棋你有份玩﹐我又有份玩﹐大家得到的東西同等﹐為何我要出多一份?"

: "能力越大﹐責任越大你聽過未。你的經濟能力比我高﹐自然有責任分擔多一點。"

: "咁又唔係咁講﹐承唔承擔責任既決定權在於我﹐我中意既話可以捐左我成副身家比非洲既細路﹐但係無人可以逼我咁做。"

: "......."

: "再講﹐你搭二十三號巴士去金鐘要五蚊﹐我搭又係要五蚊﹐無理由搭同一架車要比唔同錢架下話?d 就叫公平。"

: "唔係囉﹐你都知麥當奴既價錢係根據當地物價水平而定﹐食同一舊包﹐可以係唔同價錢囉。"

: "唔知﹐我一向都唔食呢d野。"

: "仲好講?!我平時唔想洗咁多錢先會去食麥記﹐但係對於香港某d 人﹐可能每逢過年過節先可以去食一餐﹐而你﹐餐餐都要大魚大肉﹐叫你食麥記好似叫你去死咁。"

: "咁當地既有錢人同窮人食麥記米又係比同一個價錢﹐我同你都係香港﹐梗係要平分啦。"

: "就算我同你一樣身在香港﹐你地有錢佬比稅比多好多﹐收入越多稅收越多﹐呢d 先叫公平。"

: "咁如果比既錢係同份身家成正比﹐咁我咁辛苦搵錢做咩﹐樓下訓街條友一毫子都無﹐咁係唔係去邊都唔使比錢?!超唔公平囉。"

: "當然唔係完全成正比﹐你努力工作﹐人又醒﹐搵錢多就自然可以買多d消費品同奢侈品黎娛樂﹐但係生存最基本既野人人都應該有保障﹐例如香港可以申請綜援﹐人人都可以有九年免費教育﹐睇公共醫生比個幾十蚊就得。"

: "你講得好撚有道理﹐咁借問聲副豪華限量版無敵鍍銀戰棋算唔算係奢侈品呢?"

: "...咳咳.......咳咳咳......唔好意思......喉嚨有事。"

: "........"

: "........"

: "唔想夾錢買算數﹐我去搵李澤X同我夾﹐佢咁有錢﹐等我屈佢比大份d"

-完-